ஊடகங்களில் தமிழை வெளிப்படுத்துங்களேன்

நம்ம தமிழில் இருபத்தைந்து பிற மொழிகள் கலந்திருக்க… தமிழகத் தமிழ் ஊடகங்களில் பதினெட்டு மொழிகள் கலந்திருக்க… ஈழத்துத் தமிழ் ஊடகங்களில் எட்டிற்கு மேற்பட்ட மொழிகள் கலந்திருக்க… நம்மாளுகளின் கைவண்ணத்தில் ஆன ஆங்கிலம் + தமிழ் = தமிங்கிலக் கவிதை ஒன்றைக் கீழே தருகின்றேன்…

ஹலோ!
உங்களைத் தான்…
பிளீஸ்!
கொஞ்சம் நில்லுங்களேன்…
ஐ லவ் யூ!
மெடம்…
நீங்க தான்
என் லஃவ் பாட்னர்!
பிளீஸ்!
எனக்கு நோ சொல்லாதீங்க…
நான் சுசயிட் பண்ணிடுவேன்!

இக்கவிதையினை ஆங்கிலத்தில் பதிவு செய்திருந்தால் எழுதியவரை வெள்ளைக்காரி விரும்பியிருக்கலாம். அதேவேளை ஆங்கிலத்திற்கும் பெருமை சேர்ந்திருக்கும்.

இக்கவிதையினைத் தமிழில் பதிவு செய்திருந்தால் எழுதியவரைத் தமிழச்சி விரும்பியிருக்கலாம். அதேவேளை தமிழிற்கும் பெருமை சேர்ந்திருக்கும்.

இந்தத் தமிங்கிலக் கவிதையைப் பத்திரிகையிலோ இணையப் பக்கத்திலோ படித்தோ தொலைக்காட்சியில் பார்த்தோ வானொலியில் வாசிக்கக் கேட்டோ எவளாச்சும் எழுதியவரை விரும்புவாளா? ஆங்கிலத்திற்கோ தமிழிற்கோ பெருமை சேர்ந்திருக்குமா?

இன்றைய தமிழ்த் திரை இசைப் பாடல்களிலும் பல மொழிக் கலப்புத் தான்… பணத்திற்காகப் பாடல் வரிகளில் பிறமொழி இடைச் செருகலைச் செய்ய வேண்டி இருப்பதாகப் பாடலாசிரியர் ஒருவர் தெரிவித்த நினைவு…

ஊடகங்களில் எழுதுவோர் தமிழை வெளிப்படுத்துங்களேன்; தமிழை வெளிப்படுத்தாத ஊடகங்களிற்கு எழுதாமலாவது இருங்களேன். பணத்திற்காகத் தாய் மொழியில் பிற மொழியைச் சேர்ப்பது தாய் மொழியைக் கொல்வதற்கு ஈடாகுமே!

உலகெங்கும் தூய தமிழைப் பேணத் தமிழ் எழுத்தாளர்களே முதற் பங்காளிகள்! ஊடகங்களோ இரண்டாம் பங்காளிகள்! வாசகர்களோ பார்வையாளர்களோ கேட்போர்களோ மூன்றாம் பங்காளிகள்! எல்லோரும் ஓரணியில் இணைந்தால் உலகெங்கும் தூய தமிழைப் பேண முடியுமே! எனவே, எல்லோரும் தூய தமிழைப் பேண ஒன்றிணைய முன்வாருங்களேன்.

Advertisements

செய்திக் கண்ணோட்டம் எழுதலாம் வாருங்கள்

தெருவெளித் தேர்தல் வேளை நன்றிக்குரிய நாய்கள் அமைப்பு(ந.நா.அ), அடுப்படிப் பூனைகள் அமைப்பு (அ.பூ.அ), ஆளுக்காள் அடிபடும் மக்கள் அமைப்பு (ஆ.அ.ம.அ) ஆகியன மோதிக் கொண்டன என்பது செய்தி.
நம்மாளுகளையும் நம்மவர்களின் உடைமைகள் களவு போகாமையும் காவல் காப்பது நாய்கள் என்று ந.நா.அ. ஐச் சேர்ந்தவர்களும் நெல்லுக் களஞ்சியத்தை நாடும் எலிகளைப் பிடித்துண்பதால் நம்மாளுகளுக்கு நன்மை செய்வது பூனைகள் என்று அ.பூ.அ. ஐச் சேர்ந்தவர்களும் நாய் கடிக்குமென அஞ்சி களவு எடுக்காமையும் பூனை குறுக்கால போனால் பின்வாங்கி கிடைக்க இருக்கின்ற நல்வாய்ப்புகளை இழக்கும் நம்மாளுகள் என்று ஆ.அ.ம.அ. ஐச் சேர்ந்தவர்களும் விறுவிறுப்பாகப் பரப்புரை செய்தனர்.
மக்கள் கருத்துப்படி தேர்தல் வந்தால் தலையைக் காட்டுபவர்கள், தேர்தல் முடிந்ததும் ஒடி ஒளிந்து விடுவார்கள், எவருக்கும் வாக்குப் போடமுடியாது என பெரும் எண்ணிக்கையான மக்கள் கருத்துகின்றனர். வாக்குப் போடுவது நமது உரிமை, அதனைச் சரியாகச் செய்யுங்கள் எனத் தலைவர்கள் சொல்கின்றனர். வாக்களிப்பதால் மக்களுக்கு நன்மை செய்தும் காவலர்களாக இருந்தும் பணியாற்றக் கூடிய ந.நா.அ. இற்கு வாக்களிப்பதால் எதிர்வரும் ஐந்து ஆண்டுகளுக்கு உச்சப் பயனைப் பெற முடியுமென பலராலும் நம்பப்படுகிறது.
செய்திகளை உள்வாங்கி அச்செய்தி கூறும் உண்மைகளை வெளிப்படுத்தி, அச்செய்தியால் பயனாளர்களுக்குக் கிடைக்கின்ற நன்மைகளை எடுத்துச் சொல்வதாகச் செய்திக் கண்ணோட்டம் அமையும். அதாவது இதனை எழுதுவோர் செய்திக்குள் ஒளிந்து இருக்கும் உண்மையை அரங்கிற்கு வெளிக்கொணரும் வேலையைச் செய்ய வேண்டும்.
பத்திரிகைத் துறையில் இவ்வாறு அரசியல், இராணுவம், புலனாய்வு, ஊர் மற்றும் மக்கள் முன்னேற்றம் எனப் பல துறைக் கட்டுரைகள் எழுதப்படுகின்றன. உங்களுக்குத் தெரிந்த துறையிலே ஆய்வுக் கட்டுரைகளை எழுதலாம். ஆனால், சான்றுகள் இன்றி சாட்டுக்கள் கூறமுடியாது. எனவே, தகுந்த சான்றுகளுடன் ஒப்பிட்டு, அலசி “இதனடிப்படையில் இவ்வுண்மை வெளிப்படுகிறது” என எழுதி முடிக்கலாம்.
ஏற்கனவே, ‘செய்தி எழுதலாம் வாருங்கள்’ என எழுதியிருக்கிறேன். எனது அடுத்த படைப்பாக ‘தாக்குரையும் திறனாய்வும் எழுதலாம் வாருங்கள்’ என எழுத இருக்கிறேன்.

செய்தி எழுதலாம் வாருங்கள்

இயற்கையை மீறிய ஒன்று அல்லது இயல்புக்கு மீறிய ஒன்று அல்லது திடீரெனப் புகுந்த புதிய ஒன்று எனப் பார்ப்பதற்கு அருமையாக உள்ள ஒன்றைச் செய்தி என்று கூறலாம். எடுத்துக்காட்டாக, நாய் மனிதனைக் கடிப்பது இயல்பு மாறாக மனிதன் நாயைக் கடித்தால் செய்தி.
ஒரு தென்னை கிளைவிட்டு இரண்டாகி இரண்டிலும் இளநீர் பிடுங்கிக் குடிப்பது; எனது பெண்டாட்டி வயிற்றில் பன்னிரண்டு பிள்ளைகள் கருவுற்றிருப்பதாக மருத்துவர் கூறுதல்; கடல் நீர் ஊருக்குள் நுழைந்து தூக்கத்தில் உள்ளவர்களைத் தட்டியெழுப்புதல் என எடுத்துக்காட்டாகப் பல செய்திகளைக் கூறலாம்.
அடடே! இப்பவே செய்தி எழுதப் புறப்பட்டு விட்டீர்களா? கொஞ்சம் நில்லுங்கள்! எழுதிய செய்தியால் எவரும் புண்படாதவாறு பார்த்துக் கொள்ளவும். எவரையும் சுட்டியோ தாக்கியோ எழுதாமல், பல பக்கத்தாலும் அணுகிச் சான்றுகளுடன் உண்மையை நடுநிலைமையாக நின்று நேரில் பார்த்தது போல எழுத வேண்டும். அப்படியான செய்தியே பெறுமதியானது.
பெறுமதியான செய்தியால் பொறுப்புக் கூறவேண்டியவர்கள் உடனடி நடவடிக்கைகளை எடுக்கலாம் அல்லது மக்கள் மத்தியில் பாரிய மாற்றம் நிகழலாம் அல்லது அரசில் பாரிய மாற்றம் நிகழலாம் அல்லது இயற்கை மாற்றங்களை முன்னறிந்து மக்கள் பாதுகாப்பு எடுக்கலாம். இதே போன்று இன்னும் பல நன்மைகள் கிடைக்கலாம்.
என் அறிவிற்கெட்டிய வரை செய்தி பற்றிய சிறு குறிப்பைத் தந்துள்ளேன். மேலும் “செய்திக் கண்ணோட்டம் எழுதலாம் வாருங்கள்” என அடுத்து எழுத இருக்கின்றேன். அதுவரை அறிஞர்களாகிய உங்களின் தாக்குரை மற்றும் திறனாய்வை எதிர்பார்க்கின்றேன்.